रोजचा होतो दगा पाउसपाण्यासारखा !
कोरडया मातीत आहे मी बियाण्यासारखा!!
काल माझ्या कापसाला भाव होता चांगला
आज व्यवहारात आहे,चार आण्यासारखा !!
ही पहा गेली सुगी नी ती उडाली पाखरे
संपलो केव्हा कळेना बारदाण्यासारखा !!
या शिवाराला न आली कीव माझ्यावर कधी
मी असा खपलो जसा की सांगकाम्यासारखा !!
मोसमांना येत नाही का बकुळीची फुले ?
राहिला नाही जमाना त्या जमान्यासारखा !!
तू अशी आकाशवेडी, टाळते मजला जरी
प्राशितो अपमान मी का विष घेण्यासारखा !!
विजयकुमार राउत
..................................
