वर्तमाना सांगना तू, मी कसे वागायचे?
भूतकाळाने भविष्याला कसे भागायचे ?
या भूगोलावर मी उभा, पाहतो सुर्याकडे
रे इतिहासा ! कितीदा, मी तुला वाचायचे ?
"या' धृवावर राहतो मी, "त्या' धृवावर तू तिथे
अंतर प्रकाशाचे किती वर्षांत मी मापायचे ?
मोजूनि सा-या ग्रहांना, माझयापुढे तू ठेवले
तूच त्यांना बोलना कुठल्या दिशेने जायचे?
रात्र अंधारी अशीही, निखळती तारे किती !
फाटले आकाश येथे, मी कसे झाकायचे?
मोकळा तू श्वास घे, अन् या फुलांचा वास घे
आयुष्य हे पंचागापरि खुंटीस का लटकायचे?
मी न राहू, मी न केतू, धुमकेतू मी उद्याचा
तू तुझया शहरास आता ,राख जर राखायचे !!
