मनासारखे घडेल सारे, असेहि नाही
नशिबाचे चमकतील तारे, असेहि नाही !
तुफानास तू देशिल टक्‍कर जेव्हा जेव्हा-
तुला साथ देतील किनारे, असेहि नाही !
भरुन येईल काळीज जेव्हा आभाळाचे
मयुराचे फुलतील पिसारे, असेहि नाही !
जीवन म्हणजे, सागर नाही, स्वर्ग सुखाचा
दुःखाचे नुसतेच पहारे, असेहि नाही !
जरी नसेना ही सजलेली वाट फुलांनी
पायतळी असतील निखारे, असेहि नाही !
विजयाचा आनंद कुणाला व्यक्‍त कराया
हवेत केवळ ढोल, नगारे असेहि नाही !
विजयकुमार राउत
ट्रॅक्‍टर कंपनी चौक
हिंगणा रोड
हिंगणा रोड
