शस्त्रक्रिया !
* विजयकुमार राऊतकाळजाला फाडण्याची मस्त क्रिया चालली
आमुच्या संवेदनांची शस्त्रक्रिया चालली !!
चाचण्या खोटया निघाल्या,उपचार खोटेही तसे
जिंदगी हिसकावण्याची भ्रष्ट क्रिया चालली !!
कोठुनी संसर्ग आला?कोणता आजार हा?
माणसांना तोडण्याची दुष्ट क्रिया चालली !!
स्वर्ग या वस्तीत आणू? या छताला चांदणे!
कोरडया आश्वासनांची शब्द क्रिया चालली !!
शेवटी कोणी न आले, सांत्वनाला एकदा
ही कुणाला हासण्याची स्वस्त क्रिया चालली ?
जिंदगानी शाप ज्याला वाटली होती कधी
केवढी थाटात त्याची अंत्यक्रिया चालली !
Vraut90@yahoo.com
